En Serbia, lo president actual, Boris Tadić, se presentarà a la reeleccion lo 20 de mai, après aver atengut 23% dels vòtes, 1% de mens que lo sieu principal rival, Tomislav Nikolić, cap del conservador Partit Sèrbe de Progrès (SNS), que n'a atengut 24%. Lo partit de Nikolić a menat a tèrme una operacion importanta per netejar lo sieu imatge, e se presenta coma un partit de centre-drecha, nacionalista moderat e favorable a l’intrada en Euròpa mas amb de matises.

Malgrat que lo mandat de Tadić s’agotava pas abans febrièr de 2013, a la començança d’abril lo cap del Partit Democratic (DS) forcèt la convocacion d’eleccions presidencialas anticipadas. Per o justificar, Tadić apelèt al besonh d’una nòva legitimat per avançar las reformas necessàrias per l'intrada dins l'UE.

Pasmens, una de las donadas mai significativas d'aquelas eleccions es estat la nauta abstencion: la participacion es arribada solament a 53%, sèt ponches de mens que non pas en 2008.

L'Aliança dels Ongreses de Voivodina melhora los resultats e atenh cinc sètis a l'Assemblada Nacionala de Serbia. Los bosnians de Sandžak auràn dos representants. Una lista multietnica menada per un bosnian atenh un sèti, mentre que la candidatura albanesa demòra sens cap de representacion. Al primièr torn dels comicis provincials de Voivodina, los autonomistas avançan.